#المانيا #انترنت #مهم #معلومة

اربع شباب بعتولنا على بريد الصفحة بانو اكلو مخالفات الشهر الماضي بسبب التحميل الغلط و عدم المعرفة بقوانين التحميل في الانترنت.
هاد مقال مهم وشامل عن الانترنت و التورنت باوربا، الكل يقرأو و لا تقول مو بعازتو لانو بريحكن لادام😊.

مخالفة التورنت تبدأ من 700 يورو كحد ادنى!!
★ ما هو التورنت وكيف بيشتغل وليش ممنوع رغم انو في الف برنامج تحميل غيره وكلها مسموحة الا التورنت !؟
التورنت هو برنامج تحميل مختلف عن كل برامج التحميل لانه بيستخدم خوارزمية تحميل ينفرد فيها بين كل البرامج
وهي الخوارزمية قوتها انك ممكن تحمل احدث فلم هوليود واكبر لعبة متل GTA 5 حجما 60 غيغا واغلى لعبة قد تصل ل 400 يورو بشكل مجاني وسريع عن طريق ملف صغير حجمه اقل من 1 ميغا
★ طيب ليش ممنوع ؟
بشكل عام التورنت مو كله ممنوع "المسموح نسبته قليلة جدا " وسبب المنع انك لما تحمل فلم Mad max مثلا هاد الفلم في اشخاص اشتغلو وتعبو فيه والمردود تبع الفلم هو الي بغطي رواتب الموظفين والعمال والخ من ال شتغلو
لذلك انت لما تحمل فلم حقو بالسوق 60 يورو مثلا بهيك انت عم تتسبب بخسارة الشركة المنتجة ب 60 يورو ولو انتشر هاد الشي باوروبا رح تفلس كل شركات الانتاج السنمائي لذلك منعو تحميل الافلام سواء بالتورنت او بغيره
★ طيب ليش التركيز على التورنت من حيث المخالفاات ؟
لانو اسهل طريقة للحصول على فلم The avengers age of ultron مثلا يلي سعره تقريبا 40 يورو انك تحمله عن طريق ملف تورنت لا يتجاوز حجمه 1 ميغا بشكل وسريع مجاني
وقاعدة بيانات التورنت هائلة مافيك تتصورها اديش كبير لدرجة انو بتلاقي فيها كل شي بيخطر ع بالك من افلام والعاب واغاني وكلها محمية بحقوق الطبع والنشر وكلها مجانا وهاد من اهم الاسباب الي بخلي تركيز المراقبة الحكومية ع التورنت
★ هل تحميل فلم عن طريق غير التورنت مسموح ؟
لا طبعا , اي شي محمي الحقوق ممنوع تحمله ولا تحصل عليه بأي طريقة غير مشروعة مهما كانت
★ هل التحميل من اليوتيوب مسموح ؟
على حسب شو بتحمل ... اذا فلم بعدو بالسينما دوبو نعرض ممنوع واذا بدك تحمل اي شي وترجع تنشره كمان ممنوع غير هيك مسموح
★ هل مشاهدة فيلم محمي بحقوق الطبع والنشر اونلاين مسموح ؟
نعم مسموح وعلى كل المواقع مسموح (باستثناء بعض البرامج الي بتستخدم خوارزمية التورنت بالمشاهدة اونلاين متل popcorn time و show box وغيرها )
★ هل تحميل برنامج متل Photoshop وعمل كراك له مسموح ؟
بالواقع هو ممنوع بس صعب يعرفو انك عملت كراك للبرنامج الفلاني .......بس اذا عملت الشغلة صنعة وصرت تصمم للناس وتبيع وتقبض مقابل مادي بهالحالة لازم تشتري برنامج الفوتوشوب بشكل نظامي وينطبق على جميع البرامج ام الكراك ( بالمختصر الاستخدام الشخصي لا يضر)
★ هل تكريك الويندوز مسموح ؟
ممنوع , تكريك الوينوز بوديك بستين داهية وعقوبته اشد من تكريك البرامج
★ هل التحميل عن طريق التورنت باستخدام VPN او بروكسي مسموح ؟
قانونيا ممنوع
واذا ما عرفت تركب البروكسي وتوصله للتورنت رح يكون متل عدمه
★ هل التحميل عن طريق برنامج IDM مسموح ؟
مسموح باستثناء الافلام والالعاب والاشياء المحمية بالحقوق.
بتمنى كل رفقاتكن بالمانيا يوصلهم هالمعلومات عن طريقكن و تفيدكم من عدم الوقوع باي مخالفة.
المقال هاد محمي بحقوق النشر بس بإمكانك تنسخ وتهرب 😀 بس لا تنسو دعم منشورات الصفحة يا حلوين.

ولا تنسونا من دعائكم